Dharmabhāṇakādirakṣā tṛtīyaḥ paricchedaḥ
Technical Details
dharmabhāṇakādirakṣā tṛtīyaḥ paricchedaḥ |
uktastrayāṇāmapi sāmānyena rakṣādyupāyaḥ | rakṣādayastu vācyāḥ |
tatrātmabhāve kā rakṣā yadanarthavivarjanam |
tatreti saddharmaparigrahe vartamānasyātmabhāvarakṣā cintyate yathā parānna nāśayet | idaṃ ca anarthavivarjanamāryagaganagañjasūtre saddharmadhāraṇodyatairbodhisattvairbhāṣitam-
vayamutsahāmo bhagavan nirvṛte dvipadottame |
saddharma dhārayiṣyāmaḥ tyaktvā kāyaṃ sajīvitam ||
lābhasatkāramutsṛṣṭvā sarvaṃ cotsṛjya saṃstavam |
anutsṛṣṭvā imaṃ dharmaṃ buddhajñānanidarśakam ||
ākrośaparibhāṣāṃśca duruktavacanāni ca |
kṣāntyā tānmarṣayiṣyāmaḥ saddharmapratisaṃgrahāt ||
uccagghanāṃ tarjanāṃ ca avarṇamayaśāṃsi ca |
sarvāṃstānmarṣayiṣyāmo dhārayanta imaṃ nayam |peyālaṃ ||
evaṃvighe mahāghore bhikṣurājāna kṣomaṇe |
vilopakāle sattvānāṃ saddharma dhārayāmahe ||
gambhīrā ye ca sūtrāntā vimuktiphalasaṃhitāḥ |
pratīcchakā na bhetsyanti citrāmṛkṣyanti te kathām |peyālaṃ||
maitrīṃ teṣu kariṣyāmo ye dharmeṣvapratiṣṭhitāḥ |
kāruṇyaṃ ca kariṣyāmo dhārayanta imaṃ nayam ||
dṛṣṭvā duḥśīlasattvāṃśca icchālobhapratiṣṭhitān |
aśrupātaṃ kariṣyāmo gatiḥ kāndhasya bhāvitā ||
sahasaiva ca taṃ dṛṣṭvā saddharmapratibādhakam |
dūrato maitrameṣyāmo mā no ruṣyeta eva hi ||
rakṣiṣyāmo yathāśaktayā vācākarmasu saṃvṛtāḥ |
sahasainānna vakṣyāmaḥ svapāpe'smin pratiṣṭhitān ||
dānaistathāpi satkāraiḥ paripācyeha tānnarān |
yaścaināṃścodayiṣyāmo bhūtamāpāpagocarān ||
gṛhisaṃbhavasaṃtyaktāḥ prāntāraṇyasugocarāḥ |
mṛgabhūtā bhaviṣyāmo alpārthā alpakṛtyakāḥ |peyālaṃ ||
dāntāḥ śāntāśca muktāśca grāme'sminnavatīrya ca |
deśayiṣyāmahe dharmaṃ satvā ye dharmatīrthikāḥ ||
sudūramapi yāsyāmo dharmakāmānniśamya ca |
dharmārāmaratiprāptā arthaṃ kartāsma dehinām ||
saṃmukhaṃ tatra saṃdṛśya sattvānāṃ skhalitaṃ pṛthu |
ātmaprekṣā bhaviṣyāmo dharmasauratyasṃsthitāḥ ||
asatkṛtāḥ satkṛtā vā merukalpāḥ prabhūya ca |
anupaliptā lokena bheṣyāmo lokanāyakāḥ ||
bhikṣūṇāṃ bhinnavṛttānāṃ parivādaṃ niśamya ca |
karmasvakā bhaviṣyāmo maiṣāṃ karma vipacyatām ||
vadhakān yojayiṣyanti dharmeṣveṣu hi vartatām |
ete dharmā na cāsmākaṃ saṃvidyante kathaṃcana ||
asmākaṃ śramaṇānāṃ hi na ca śrāmaṇakā guṇāḥ |
bhūtāṃ codana saṃśrutya idaṃ sūtraṃ pratikṣipan ||
saṃchinnakarṇanāsānāmādarśaiṣāṃ kutaḥ priyaḥ |
codanāṃ bhūtataḥ śrutvā saddharmaṃ te kṣipanti tam ||
ye bhikṣavo bhaviṣyanti saddharmapratigrāhakāḥ |
ceṣṭiṣyante tathā teṣāṃ kaściddharmamimaṃ śṛṇot ||
rājāno grāhayiṣyanti bhetsyanti ca mahājanāḥ |
buddhādhiṣṭhānataḥ sattvā dharmaṃ śroṣyantimaṃ tadā ||
tasmin kāle vayaṃ kaṣṭe tyaktvā kāyaṃ sajīvitam |
saddharmaṃ dhārayiṣyāma sattvānāṃ hitakāraṇāt ||iti||
āryasaddharmapuṇḍarīke'pyuktam-
ācāragocaraṃ rakṣet asaṃsṛṣṭaḥ śucirbhavet |
varjayetsaṃstavaṃ nityaṃ rājaputrebhi rājabhiḥ ||
ye cāpi rājñāṃ puruṣāḥ kuryāttehi na saṃstavam |
caṇḍālamuṣṭikaiḥ śauṇḍaistīrthikaiścāpi sarvaśaḥ ||
adhimānīnna seveta vinaye cāgame sthitān |
arhantasaṃmatān bhikṣūn duḥśīlāṃścaiva varjayet ||
bhikṣuṇīṃ varjayennityaṃ hāsyasaṃlāpagocarām |
upāsikāśca varjeta prakaṭamanavasthitāḥ ||
strīpaṇḍakāśca ye sattvāḥ saṃstavaṃ tairvivarjayet |
kuleṣu cāpi vadhukāḥ kumāryaśca vivarjayet ||
na tāḥ saṃmodayejjātu kauśalyaṃ sādhu pṛcchitum |
saṃstavaṃ ca vivarjeyā saukaraurabhrikaiḥ saha ||
strīpoṣakāśca ye sattvā varjayettehi saṃstavam |
naṭairjhallakamallebhirye cānye tādṛśā janāḥ ||
vāramukhyānna seveta ye cānye bhogavṛttinaḥ |
pratisaṃmodanaṃ tebhiḥ sarvaśaḥ parivarjayet ||
yadā ca dharmaṃ deśeyā mātṛgrāmasya paṇḍitaḥ |
na caikaḥ praviśettatra nāpi hāsyasthito bhavet ||iti ||
ayaṃ cāparo'nartho bhavedyadidaṃ mārakarmoktaṃ prajñāpāramitāyām-
māraḥ pāpīyāṃstasya bodhisattvasyāciraṃ yānasaṃprasthitasyāntike balavattaramudyogamāpatsyate ||
atraivāha- punaraparamānanda yasmin samaye bodhisattvo mahāsattvaḥ prajñāpāramitāyāṃ yogamāpadyate, tasmin samaye mārāḥ pāpīyāṃso bodhisattvasya viheṭhanamupasaṃharanti, bhayaṃ saṃjanayanti |ulkāpātān diśi digdāhānutsṛjanti saṃdarśayanti, apyeva nāma ayaṃ bodhisattvo mahāsattvo'valīyeta, romaharṣo vāsya bhavediti | yenāsyaikacittotpādo'pi kṣīyetānuttarāyāḥ samyaksaṃbodheriti | punaraparamanyavijñānasaṃjñino likhiṣyanti yāvatparyavāpsyanti | na vayamatrāsvādaṃ labhāmahe ityutthāyāsanātprakramiṣyanti | evaṃ vijṛmbhamāṇā uccagghanto yāvatparyavāpsyantīti mārakarma ||
evamutpatsyante janapadagrāmādivitarkāḥ | evamācāryopādhyāyamātāpitṛmitrāmātyajñātisālohitamanasikārāḥ |evaṃ coramanasikārāḥ | evaṃ cīvarādimanasikārāḥ | punaraparaṃ dharmabhāṇakaśchandiko bhaviṣyati imāṃ gambhīrāṃ prajñāpāramitāṃ lekhayituṃ yāvadvācayituṃ dharmaśravaṇikaśca kilāsī bhaviṣyati |evaṃ viparyayāt | dharmabhāṇakaśca deśāntaraṃ gantukāmo bhaviṣyanti dhārmaśravaṇikāśca neti neyam | evaṃ dharmabhāṇako maheccho bhaviṣyati dhāmarśravaṇiko'lpeccha iti neyam | saṃkṣepāddharmabhāṇakadhārmaśravaṇikayoryā kācidvidhuratā, sarva tanmārakarmetyuktam ||
āryagaganagañjasūtre'pyuktam- iti hi yāvadakuśaladharmānuvartanatā, kuśaladharmotsargaśca, sarva tanmārakarmeti ||
āryasāgaramatisūtre'pyāha,punaraparaṃ bhagavan bodhisattva āraṇyako bhavati prāntaśayyāsanābhirato'lpecchuḥ saṃtuṣṭaḥ pravivikto'saṃsṛṣṭo gṛhasthapravrajitaiḥ | so'lpārthatayā alpakṛtyatayā ca sukhaṃ viharati, na ca bāhuśrutpaparyeṣṭāvabhiyukto bhavati, na sattvaparipākāya na ca dharmaśravaṇe vā dharma[sāṃ] kathye vā arthaviniścayakathāyāṃ vā vartamānāyāṃ saṃkramitavyaṃ manyate | na paripṛcchanajātīyo bhavati | na kiṃkuśalābhiyukto bhavati | tasyāraṇyavāsena caikārāmaratitayā ca kleśā na samudācaranti | sa paryutthānaviṣkambhaṇamātreṇa tuṣṭiṃ vindati | na cānuśayasamuddhātāya mārgaṃ bhāvayati | sa tatra nātmārthāya pratipanno bhavat, na parārthāya | ayaṃ bhagavan bodhisattvasyāraṇyavāsapratisaṃyuktasaptamo mārāṅkuśa iti || peyālaṃ || punaraparaṃ bhagavan bodhisattvaḥ kalyāṇamitrapratirūpakāṇi pāpamitrāṇi sevate, bhajate paryupāste | ye hyenaṃ saṃgrahavastubhyo vicchandya puṇyasaṃbhārātsaddharmaparigrahādvicchandya praviveke niyojayanti | alpārthāyālpakṛtyatāyāṃ niyojayanti | śrāvakapratyekabuddhapratisaṃyuktāścāsmai kathā abhīkṣṇaṃ deśayanti || yasmīśca samaye bodhisattvo vivekavāsena mahāyāne'bhyudgacchettasmin samaye taṃ bodhisattvaṃ vaiyāvṛtyapalibodhe niyojayanti | vaiyāvrṛtyaṃ bodhisattvenāvaśyaṃ karaṇīyam | yasmiśca samaye bodhisattvo vaiyāvṛtye saṃniyojayitavyaḥ, tasmin samaye viveke niyojayanti | eva cainaṃ vadanti-ārabdhavīryasya bodhisattvasya bodhirna kusīdasya | sacetvamaṣṭābhirnavabhirvā kalpairanuttarāṃ samyaksaṃbodhiṃ nābhisaṃbhotsyase, na bhūyaḥ śakyasyanuttarāṃ samyaksaṃbodhimabhisaṃboddhum | tatra bhagavān bodhisattvo'tyārabdhena vīryeṇa sthānaṃ khalu punaretadvidyate yannirvāṇaphalaṃ prāpnuyāt | ayaṃ bhagavan bodhisattvasya kalyāṇamitrapratirūpakeṇa daśamo mārāṅkuśaḥ || ye'pi tato'nye bodhisattvayānīyāḥ pudgalā mārāṅkuśāvidvāḥ pratyaveteṣu dharmeṣu caranti, taiḥ sārdha ratiṃ vindati | tathā hi tadanuvartakā bhavanti, sa hīnasevī viśeṣamanadhigato hīnagatiṃ gacchati, yaduta dhanvagatiṃ jaḍaiḍamūkagatiṃ yāvadekādaśo mārāṅkuśa itiḥ ||
yena caivaṃ sāṃtatyārabdhavīryasya nirvedātsarvathā bodhisattvabhāva eva bhavati, ata eva ratnameghe'bhihitam-
iha bodhisattvaḥ sarveryāpatheṣu vīryamārabhate | tathā cārabhate yathā na kāyakhedaṃ sa janayati, na cittakhedam | idamucyate bodhisattvasya sāṃtatyavīryamiti | kīdṛśaṃ tadvīrya yena khedo na bhavati? yadidamalpabalasya gurukarmārambho'tivelāyāṃ vā aparipakkādhimuktervā duṣkarakarmārambhastadyathā svamāṃsadānādiḥ | dattaścānenātmabhāvaḥ | kiṃ tvakālaparibhogādvārayati | anyathā hi teṣāmeva sattvānāṃ bodhisattvakhedena bodhicittabījanāśānmahataḥ phalarāśernāśaḥ syāt ||
ataśca gaganagañjasūtre'bhihitam-akālapratikāṅkṣaṇatā mārakarmeti ||
nāpyakāla ityātmabhāvatyāgameva notpādyam | abhyāsānārambhāddhi na kadāciddadyāt | tasmādevaṃ smṛtimupasthāpya bodhicittaparipācanavirodhibhyo mohātsvārthaghātibhyaḥ piśitāśanebhyaḥ karmakāribhyaścātmabhāvo rakṣitavyaḥ ||
bhaiṣajyavṛkṣasya sudarśanasya
mūlādibhogasya yathaiva bījam |
datvāpi saṃrakṣyamakālabhogā-
tsaṃbuddhabhaiṣajyatarostathaiva ||
ayaṃ samāsato mārakarmānarthaḥ ||
asya visarjanaṃ ratnameghasūtre kathitam-kathaṃ ca kulaputra atra bodhisattvo mārakarmaparihāropāyakuśalo bhavati? iha bodhisattvo'kalyāṇamitraṃ sarveṇa sarva parivarja[yati] | [a]pratirūpadeśavāsaṃ lokāyatamantrasevanabhāvanāṃ lābhasatkārapūjopasthānabahumānaṃ sarveṇa sarva parivarjayati | ye cānye upakleśā bodhipakṣyamārgāntarāyikāstān sarveṇa sarva parivarjayati | teṣāṃ ca pratipakṣaṃ bhajate ||
atraiva cākalyāṇamitralakṣaṇamuktam-śīlavipannapudgalavivarjanatayā pāpamitraparivarjanā veditavyā | evaṃ dṛṣṭivipannācāravipannājīvavipannapudgalavivarjanatayā | saṃgaṇikārāmapudgalavivarjanatayā | kusīdapudgalavivarjanatayā | saṃsārābhiratapudgalavivarjanatayā | bodhiparāṅmukhapudgalaparivarjanatayā | gṛhisaṃsargavivarjanatayā pāpamitraparivarjanā veditavyā | tena ca kulaputra etāni sthānāni parivarjayatā na teṣāṃ pudgalānāmantike duṣṭacittamutpādayitavyaṃ na pratighacittaṃ nāvamanyanācittamutpādayitavyam | evaṃ cānena cittamupasthāpayitavyam | uktaṃ hi bhagavatā-dhātuśaḥ sattvāḥ kāmādidhātumāstravanti jāyante saṃsyandante, saṃsargācca vinaśyanti | tasmādahaṃ saṃsarga varjayiṣyāmīti ||
bodhicittasaṃpramoṣo'pyanarthaḥ | tasya ca heturukto ratnakūṭe-
caturbhiḥ kāśyapa dharmaiḥ samanvāgatasya bodhisattvasya bodhicittaṃ muhyati | katamaiścaturbhiḥ? ācāryagurudakṣiṇīyavisaṃvādanatayā | pareṣāmakaukṛtye kaukṛtyopasaṃharaṇatayā | mahāyānasaṃprasthitānāṃ ca sattvānāmavarṇāyaśokīrtyalokaniścāraṇatayā | māyāśāṭhayena ca paramupacarati nādhyāyāśayeneti ||
asya vivarjanamatroktam-caturbhiḥ kāśyapa dharmaiḥ samanvāgatasya bodhisattvasya sarvāsu jātiṣu jātamātrasya bodhicittamāmukhībhavati | na cāntarā muhyati yāvadbodhimaṇḍaniṣadanāt | katamaiścaturbhiḥ?yaduta jīvitahetorapi saṃprajānan mṛṣāvādaṃ na prabhāṣate | antaśo hāsyaprekṣikayāpi adhyāśayena ca sarvasattvānāmantike tiṣṭhatyapagatamāyāśāṭhayatayā | sarvabodhisattveṣu ca śāstṛsaṃjñāmutpādayati | caturdiśaṃ ca teṣāṃ varṇa niśvārayati | yāṃśca satvān paripācayati, tān sarvānanuttarāyāṃ samyaksaṃbodhau samādāpayati prādeśikayānāspṛhaṇatayā | ebhiḥ kāśyapa caturbhiriti ||
siṃhaparipṛcchāyāmapyāha-
na jātu dharmadānasya antarāyaṃ karoti yaḥ |
tenāsau labhate kṣipraṃ lokanāthehi saṃgamam |
tathā jātismarā [dū] dharmadānājjānīṣvaivaṃ kumāraka || iti||
tathātraiva-
bodhicittaṃ na riñcati tena sarvāsu jātiṣu |
svapnāntare'pi taccitaṃ kiṃ punaryadi jāgrataḥ ||
āha-
yeṣu viratisthāneṣu grāmeṣu nagarepu vā |
samādāyeti bodhāya tena cittaṃ na riñcati ||
āryamañjuśrībuddhakṣetraguṇavyūhālaṃkārasūtre'pyāha-caturbhidharmaiḥ samanvāgato bodhisattvaḥ praṇidhānānna calati || peyālaṃ || nihatamānaśca bhavati, īrṣyāmātsaryaparivarjakaśca bhavati, parasaṃpadaṃ ca dṛṣṭvā nāttamanā bhavatīti ||
idameva pātrabodhicittasya sphuṭataramasaṃpramoṣakāraṇaṃ yattatraiva ratnakūṭe'bhihitam-sarveryāpatheṣu bodhicittaparikarmaṇatayā bodhicittapūrvagamatayā ceti ||
tathā hi candrapradīsūtre pāṭhaḥ -
ārocayāmi prativedayāmi vo
yathā yathā bahulu vitarkayennaraḥ |
tathā tathā bhavati tannimnacittaḥ
tehī vitarkehi tanniśritehi ||iti||
avasādo'pyanarthaḥ | etadvarjanaṃ ca ratnameghe dṛṣṭam -iha bodhisattvo naivaṃ cittamutpādayatiduṣprāpā bodhirmanuṣyabhūtena satā | idaṃ ca me vīrya parīttaṃ ca | kusīdo'ham | bodhiścādīptaśiraścailopamena bahūn kalpān bahūni kalpaśatāni bahūni kalpasahastrāṇi samudānetavyā | tannāhamutsaha īdṛśaṃ bhāramudvodum || kiṃ tarhi bodhisattvenaivaṃ cittamutpādayitavyam-ye'pi te'bhisaṃbuddhāstathāgatā arhantaḥ samyaksaṃbuddhāḥ, ye cābhisaṃbudhyante, ye vā abhisaṃbhotsyante, te'pīdṛśenaiva nayena īdṛśyā pratipadā | īdṛśenaiva vīryeṇābhisaṃbuddhā abhisaṃbudhyante'bhisaṃbhotsyante ca | yāvanna te tathāgatabhūtā evābhisaṃbuddhāḥ | ahamapi tathā tathā ghaṭiṣye tathā tathā vyāyaṃsye sarvasattvasādhāraṇena vīryeṇa sarvasattvārambaṇena vīryeṇa yathāhamanuttarāṃ samyaksaṃbodhimabhisaṃbhotsya iti ||
punaraparo'nartho ratnakūṭe dṛṣṭaḥ-aparipāciteṣu sattveṣu viśvāso bodhisattvasya skhalitam, abhājanībhūteṣu sattveṣūdārabuddhadhamasaṃprakāśanāt bodhisattvasya skhalitam, udārādhimuktikeṣu sattveṣu hīnayānasaṃprakāśanā(d) bodhisattvasya skhalitamiti | samyaksmṛtyupasthiteṣu śīlavatsu kalyāṇadharmeṣu prativimānanā duḥśīlapāpadharmasaṃgrahā bodhisattvasya skhalitamiti ||
anadhimuktirapyanarthaḥ | yathoktaṃ rāṣṭrapālasūtre-
yasyadhimukti na vidyati buddhe dharmagaṇe ca na tasyadhimuktiḥ |
śikṣavrateṣu na tasyadhimuktiḥ pāpamatestrirapāyamukhasya ||
sa itaścyuto manujeṣu karmavaśādabudho hi vimūḍhaḥ |
narakeṣvatha tiryagatīṣu pretagatīṣu ca vindati duḥkham || iti||
asya visarjanaṃ ratnakūṭe'bhihitaṃ dṛṣṭam-yeṣu cāsya gambhīreṣu buddhirnāvahagāhate, tatra tathāgata eva sākṣīti kṛtvā na pratikṣipati | tathāgata evaṃ jānīte, nāhaṃ jāne | anantā buddhabodhirnānādhimuktikatayā tathāgatānāṃ sattveṣu dharmadeśanā pravartata iti ||
vaiyāvṛtyavartamānenānarthavivarjanakuśalena bhavitavyam | bodhisattvaprātimokṣe hi sahadhārmike dharmaśravaṇe, tathāgatapūjāyāṃ ca vaiyāvṛtyamupadiṣṭam | tatra yā vṛttiḥ, sā ratnarāśisūtrādāgatā | tatra vaiyāvṛtyakareṇa bhikṣuṇā sarvabhikṣusaṃghasya cittamabhirādhayitavyam | tatra ye bhikṣava āraṇyakāḥ prāntaśayyāsanikāsteṣāṃ vaiyāvṛtyakareṇa bhikṣuṇā sarveṇa sarva na karmasamutthānaṃ dātavyam | yadi punarāraṇyakasya bhikṣoḥ saṃghaparyāpannaṃ śaikṣakaṃ karma prāpnuyāta,etena vaiyāvṛtyakareṇa bhikṣuṇā ātmanaiva tatkartavyam | anyataro vā bhikṣuradhyeṣyo na punaḥ sa āraṇyako bhikṣurutpīḍayitavyaḥ | tatra yo bhikṣuḥ piṇḍacāriko bhavati, tasya tena vaiyāvṛtyakareṇa bhikṣuṇa praṇītabhojaneṣu saṃvibhāgaḥ kartavyaḥ | tatra kāśyapa yo bhikṣuryogācārī bhavati, tasya tena vaiyāvṛtyakareṇa bhikṣuṇā ānulomikānyupakaraṇānyupasaṃhartavyāni,glānapratyayabhaiṣajyapariṣkārāśca | yasmiśca pradeśe sa yogācārī bhikṣuḥ prativasati, tasmin pradeśe noccaśabdaḥ kartavyaḥ | rakṣitavyo vaiyāvṛtyakareṇa bhikṣuṇā yogācārī bhikṣuḥ | śayyāsanopastambhanāsya kartavyā | praṇītāni ca saṃpriyāṇi yogācārabhūmyanukūlāni khādanīyabhojanīyānyupanāmayitavyāni || pe || ye bhikṣavo bāhuśrutye'bhiyuktā bhavanti, teṣāmutsāho dātavyaḥ | yāvatte'pi rakṣitavyāḥ | ye dhārmakathikā bhikṣavo bhaviṣyanti, teṣāṃ pratīhāradharmatā kartavyā | yāvaddhārmaśravaṇikāścodyojayitavyāḥ | parṣanmaṇḍalaṃ parisaṃsthāpayitavyam | sāṃkathyamaṇḍalaṃ viśodhayitavyaṃ yāvatsādhukārabahulena cāsya bhavitavyam | peyālaṃ | na kkacidvastuni aiśvaryasaṃjñotpādayitavyā | kiyatparīttamapi kāryaṃ saṃghamatena kartavyaṃ na svamatena, yāvanna sāṃghikaścāturdiśasāṃghikakena saṃsṛṣṭaḥ kartavyaḥ | evaṃ viparyayādevaṃ staupikena sahānyonyasaṃsargapratiṣedhaḥ | yadi cāturdiśe saṃghe vaikalpaṃ bhavetsāṃghikaśca lābha utsado bhavettena vaiyāvṛtyakareṇa bhikṣuṇā bhikṣusaṃghamekamānasaṃ kṛtvā sāṃghikalābhāccāturdiśasāṃghikakāryaṃ kartavyam | evaṃ stūpe'pi pralugne'yameva vidhirdāyakān dānapatīn vā samādāpya pratisaṃskartavya ityājñā | yadi punaḥ kāśyapa kiyadbahurapi staupiko lābho bhavet, sa vaiyāvṛtyakareṇa na saṃghe na cāturdiśasaṃghe upanāmayitavyaḥ | tatkasmāddhetoḥ? yā staupikā antaśa ekadaśāpi śrāddhaiḥ prasādabahulairniryātitā bhavati, sā sadevakasya lokasya caityam, kaḥ punarvādo ratnaṃ vā ratnasaṃmataṃ vā | yacca stūpe cīvaraṃ niryātitaṃ bhavati, tattatraiva tathāgatacaitye vātātapavṛṣṭibhiḥ parikṣayaṃ gacchatu | na punaḥ staupikaṃ cīvaraṃ hiraṇyamūlyena parivartayitavyam | na hi staupikasya kaścidargho nāpi stūpasya kenacidvaikalyam | yo hi kaścitkāśyapa vaiyāvṛtyakaro bhikṣū ruṣṭacittaḥ śīlavatāṃ dakṣiṇīyānāmaiśvaryādājñaptiṃ dadāti, sa tenākuśalena karmaṇā narakagāmī bhavatīti | yadi manuṣyalokamāgacchati, dāso bhavati parakarmakaro lābhī ca bhavati khaṭacapeṭapracaṇḍaprahārāṇām | peyālaṃ | da[ṇḍaka]rmabhayatarjitaṃ bhikṣuṃ karoti, akālapreṣaṇamakālajñaptiṃ dadāti | sa tenākuśalena karmaṇā bahuśaṅkurnāma pratyekanarakastatrāsyopapattirbhavati | yāvatsahastraviddhaḥ kāyo bhavati, ādīptaḥ pradīptaḥ saṃprajvalitaḥ | peyālaṃ | yojanaśatavistārapramāṇā jihvā bhavati | tasya tatra jihvendriye bahūni śaṅkuśatasahastrāṇi ādīptāni ayasmayāni nikhātāni bhavanti | yo hi kaścitkāśyapa vaiyāvṛtyakaro bhikṣurāgatāgataṃ sāṃdhikaṃ lābhaṃ saṃnidhiṃ karoti, na kālānukālaṃ dadāti, uddhasyāpayitvā viheṭhayitvā dadāti, keṣāṃcinna dadāti, sa tenākuśalamūlena jaṅghā nāma gūthamṛttikāpretayonistatrāsyopapattirmavati | tatra asya anye pretā bhojanaṃ gṛhītvā apadarśayanti | sa uddhasyamānastadbhojanamanimiṣābhyāṃ netrābhyāṃ paśyamānaḥ kṣutpipāsāparigato duḥkhāṃ vedanāṃ vetti, na ca varṣasahastreṇāpi tasya bhojanasya lābho bhavati | yadapi kadācitkārhicidbhojanaṃ labdhaṃ bhavati, taduccāraṃ bhavati, pūyaśoṇitaṃ veti ||
saṃgharakṣitāvadāne'pyanartha uktaḥ-yāṃstvaṃ saṃgharakṣita sattvānadrākṣīḥ kuḍayākārāṃste bhikṣava āsan | taiḥ sāṃghikaṃ kuḍayaṃ śleṣmaṇā nāśitam | tasya karmaṇo vipākena kuḍayākārāḥ saṃvṛttāḥ | yāṃstvaṃ saṃgharakṣita sattvānadrākṣīḥ stambhākārāṃste bhikṣava āsan | taiḥ sāṃghikastambhaḥ siṃhāṇakena nāśitaḥ | tena stambhākārāḥ saṃvṛttāḥ | yāṃstvaṃ sattvānadrākṣīrvṛkṣākārān patrākārān phalākārān, te'pi bhikṣava āsan | tairapi sāṃghikāni vṛkṣapatrapuṣpaphalāni paudgalikaparibhogena paribhuktāni | tena te vṛkṣapatrapuṣpaphalākārāḥ saṃvṛttāḥ | yāṃstvaṃ sattvānadrākṣī rajjvākārān saṃmārjanyākārāṃste bhikṣava āsan | taiḥ sāṃghikā rajjusaṃmārjanyaḥ paudgalikaparibhogena parimuktāḥ | tena rajjvākārāḥ saṃmārjanyākārāśca saṃvṛttāḥ | ye tvaṃ sattvamadrākṣīstaṭṭā[pvā?] kāraṃ sa śrāmaṇeraka āsīt | sa taṭṭukaṃ nirmādayati | āgantukāśca bhikṣavo'bhyāgatāḥ | tairasau dṛṣṭaḥ pṛṣṭaśca-śrāmaṇeraka, kimayaṃ saṃghasya pānakaṃ bhaviṣyati? sa mātsaryopahatacittaḥ kathayati-kiṃ na paśyatha taṭṭukaṃ nirmāditaṃ pītaṃ pānakamiti? te vṛttā veleti nairāśyamāpannā hīnadīnavadanāḥ prakrāntāḥ | sa tasya karmaṇo vipākena taṭṭukākāraḥ saṃvṛttaḥ || yaṃ tvaṃ sattvamadrākṣīrudūkhalākāraṃ so'pi bhikṣurāsīt | tasya pātrakarma pratyupasthitam | tatra caikaḥ śrāmaṇerako'rhan mudgāvāre niyuktaḥ | sa tenoktaḥ- śrāmaṇeraka, dadasva me khalistokaṃ kuṭṭayitveti | sa kathayati-sthavira, tiṣṭha tāvanmuhūrtam | vyagro'smi | paścātkuṭṭayitvā dāsyāmīti | sa saṃjātāmarṣaḥ kathayati-śrāmaṇeraka, yadi mama kalpeta udva(dū)khalaṃ spaṣṭum, tvāmevāhamudva(dū)khale prakṣipya kuṭṭayeyam, prāgeva khalistokamiti | sa śrāmaṇeraḥ saṃlakṣayati-tīvraparyavasthānaparyavasthito'yam | yadyahamasmai prativacanaṃ dāsyāmi, bhūyasyā mātrayā prakopamāpatsyatīti tūṣṇīmavasthitaḥ | yadāsya paryavasthānaṃ vigataṃ tadopasaṃkramya kathayati-sthavira, jānīṣe tvaṃ ko'hamiti? sa kathayati-jāne tvāṃ kāśyapasya samyaksaṃbuddhasya pravrajitaṃ śrāmaṇerakam | ahamapi bhikṣuḥ sthaviraḥ | śrāmaṇerakaḥ kathayati-yadyapyevam, tathāpi tu yanmayā pravrajitena karaṇīyaṃ tatkṛtam | kiṃ kṛtam? kleśaprahāṇam | chinnasakalabandhano'haṃ sarvabandhanavinirmuktaḥ | kharaṃ te vākkarma niścāritam | atyayamatyayato deśaya | apyeva nāma etatkarma parikṣayaṃ tanutvaṃ paryādānaṃ gacchediti | tena atyayamatyayato na deśitam | tena karmaṇodūkhalākāraḥ saṃvṛttaḥ | yāṃstvaṃ sattvānadrākṣīḥ sthālyākārān, te kalpikārakā āsan bhikṣūṇāmupasthāpakāḥ | te bhaiṣajyāni kkāthayanto bhikṣubhirapriyamuktāḥ | taiścittaṃ pradūṣya sthālyo bhinnāḥ | tena sthālyākārāḥ saṃvṛttāḥ | yaṃ tvaṃ sattvamadrākṣīrmadhye chinnaṃ tantunā dhāryamāṇam, so'pi bhikṣurāsīllābhī grāhikaḥ | tena mātsaryābhibhūtena lābhaḥ saṃparivartitaḥ | yo vārṣikaḥ sa haimantikaḥ pariṇāmitaḥ | yastu haimantikaḥ sa vārṣikaḥ pariṇāmitaḥ | tasya karmaṇo vipākena madhye chinnastantunā dhāryamāṇo gacchati ||
||dharmamāṇakādirakṣā paricchedastṛtīyaḥ ||